Enn gid pou protez ou si ou pe al sipermarse

Prekosion ki kapav pran kan ou pe bizin al sipermarse pou pa gagn oubien transmet viris

Avan al sipermarse:

Fer enn lalis komision bien konple.
Met lalis lor enn papie ek prepar enn plim oubien enn kreyon ki ou pou zete apre avek papie-la (sinon desinfekte li).
Organiz lalis-la dapre bann reyon sipermarse kot ou pe ale (esey vizializ bann reyon-la) pou ou kapav respekte trase.
Si ou pe kapav, aste osi komision pou fami ou vwazin ki vie oubien malad. Koumsa zot pa bizin al sipermarse (koz lor telefonn).
Dir zot ki ou pou kit zot komision divan zot laport ek pa bizin sorti koz ar ou.
Dir zot ki zot bizin pran prekosion pou tous bann sak-la (par exanp, servi legan ou bien met enn plastik dan zot lame pou devid bann sak ek apre zet plastik-la -get lezot instriksion anba)
Me gard kantite rezonab dapre konsign sipermarse (par exanp enn sipermarse pa pou les pran plis ki 3 pake bann prodwi de baz).
Prepar ou pies Rs 5 ouswa Rs 10 pou kadi. Li posib pa pou ena lesanz laba.
Prepar enn latab deor pou poz bann prodwi kan ou pou retourne.

Kan ariv divan sipermarse:

Met ou mask. Si ou ena legan, met zot. Me pa fer gaspiyaz parski bann travayer dan servis lasante pli bizin sa bann lekipman-la. Si ou pena mask, fabrik ou prop mask.
Kan ou finn koumans trap kadi avek ou lame, pa tous ou figir ditou, sirtou ou labous, ou nene ek ou lizie.
Si ena lake, gard distans enn met omwin avek dimounn.
Gard pasians. Tou dimounn dan mem problem.
Si posib, pa bizin tir ou telefonn pou li pa infekte.

Kan dan sipermarse:

Swiv ou lalis. Pran zis komision ki bizin.
Pa koste avek lezot dimounn. Kontign gard omwin enn met avek lezot.
Respekte bann travayer sipermarse. Zot pe rann ou servis vinn travay. Pa koste ar zot ek pa ankoler avek zot.
Si enn zafer pena, les tonbe. Si kapav ranplas par lot lartik, fer li.
Pa servi telefonn si posib.
Triy bann komision pou ou ek separ pou lezot dimounn dan lot sak.
Kan pas lakes, servi kart si ou kapav.

Kan sorti depi sipermarse:

Zet ou lalis papie ek ou plim oubien ou kreyon dan poubel.
Netway ou lame avek sanitizer oubien lav bien ou lame si posib.
Si ou finn aste pou lezot dimounn, al kit sak komision divan zot laport san rant dan zot lakaz.
Kan ou ariv kot ou, poz tou deor lor enn latab.
Kit ou savat oubien soulie deor ek zet ou legan ek ou mask.
Si posib, enn dimounn ki andan vinn avek legan san koste ar ou.
Al bengne letan lot dimounn okip bann prodwi.
Li transfer bann prodwi perisab dan frizider.
Pas enn kout sifon inbibe avek solision zavel lor bann lanbalaz prodwi.
Met ou linz lave.

Reader Interactions