Kadans siklonn se enn ti text ki finn paret an Desam 2021 dan liv Ti zistwar ki finn pibliye par Daarka ek ilistre par Geeani kot Krike Krake Edition

Kadans siklonn

Enn warning siklonn klas 2 an viger lor Moris…

Degaze vit-vit, bizin desann lantenn televizion; bizin koulout dibwa lor bann gran-gran pano vit lavarang! Divan-la ape koumans vinn an rafal. Bann brans pie mang ape fwet kont tol lor nou lakaz kouma dir zot inn vinn fou-fol. Mo ena zis set-an ek mo pe gagn inpe per. Anmemtan, tou sa sirk ki bann gran ape fer la pe paret mari interesan. Pa pe tro konpran ki pe arive me kitsoz pe arive! Se pa mem routinn ki toule zour!

Mo mama ek mo bann ser gagn traka nou gran la varang avek tou so bann lafnet an vit. Sa lavarang-la li kouma dir enn lakok dizef, bien frazil, bien frel-frel. Rezman mo papa finn fer demars pou gagn inpe plans dibwa pou koulout lor bann pano vit. Pa pe resi kouver partou me pe fer enn lizaz. Li koulout bann plans-la an diagonal lor bann kare vit. Mo ape resi louk atraver bann triyang vit dan lafnet. Mo trouv bann zoli-zoli mang mezon rouz ki pe tom anba. Sa fer mwa sagrin. Mo per ki pie mang pa resi tini.

Pie mang se mo kamarad sa. Mo bien kontan mont lor li. Li ena enn zoli ti plas kot mo kapav kas enn poz, apiy mo ledo ek tal mo de lazam. Mo kontan pran enn liv ek lir-lir lao, dan pie mang. Mo mem kapav trouv lot kote sa gro miray ki separ nou vie lakaz dibwa ek lakaz beton nou bann vwazin. Mo kontan louk-louke pou gete si kapav trouv zot, kouma zot ete, ki zot ape fer, si ena zanfan laba osi, si mo kapav gagn enn ti kamarad pou koze, pou zwe. Mo finn tann bann gran dir ki bann vwazin-la zot osi zot lokater kouma nou. Me lakaz laba-la paret pli modern ki pou nou. Nou lakaz inpe kraz-kraze, inpe vie, inpe mizerab. Me mo bien kontan nou lakaz kanmem.

Dan mo lespri, nou vie lakaz li vivan. Mo sir ena zistwar interesan ki’nn pase ladan. Li ena enn gran lakav dan so soubasman. Inpe nwar-nwar ladan. Lakoz samem mo mama pa kontan ki mo al zwe anba lakav. Mo res zwe zis dan so rebor. Ena enn ta ti trezor: bann ti bout koki briyan, bann ti bout marb bien blan. Dapre lord, ena bann trezor dan fon sa lakav-la. Me mo per pou rant plis ki sa parski li vremem bien nwar andan.

Dan lasam deryer kot nou ti pe dormi, mwa ek mo trwa ser ek mo mama, ti ena bann pano doub dan miray dibwa. Bann ti plas kot kapav kasiet bann lezot trezor. Mo ti touletan panse ki bann pirat finn deza servi sa lakaz-la pou gard bann trezor ek bann mesaz sekre. Ki kone enn zour kitfwa mo pou resi trouv sa bann trezor ek mesaz sekre la !

Abe ki pou arive si sa siklonn la fer bel sega e kraz nou lakaz? Trezor ek mesaz pou voltize ! Ayo Mama ! Bye-bye pie mang, bye-bye trezor, bye-bye mesaz sekre!

Siklonn-la koumans fer mwa plis per. Freser ape rant atraver bann plans dibwa nou bann miray. Ena plas pe koule. Kouran finn koupe. Bann pie ek zot bann brans ape bouze; vire-tourne kouma fouka. Nou toule trwa tifi avek Mama finn rant dan nou lasam, lor nou de lili avek zis enn labouzi. Fode pa al dan lavarang! Tansion vit kase, klat lor nou, bles nou! Godon osi inpe danzere lakoz pie mang ki bien pre ar li kapav tonbe e kraz li.

Twalet ape koule ek fode vremem pe gagn for tis pou ale. Taler labouzi tengn avek bann dilo ki ape koule! Mo gagn frison! Enn lanwit, divan ek lapli mari for. Tou bann tol ek dibwa dan lakaz ape fer kalang-kalang. Me pa kapav fer nanye apart atann ki sa siklonn-la pase.

Gramatin, letan nou alim radio, nepli ena warning. Divan finn tonbe ek lapli ape diminie. Partou mouy-mouye ek ena plin-tank fey ek brans dan lakour.

Avan nou pran kouraz pou koumans met inpe lord, nou met dite bwi lor dife. Pa pou manz dipin zordi parski pa kone mem si boulanzri finn ouver. Biskwi kabinn ek diber lor baz! Mwa mo bien kontan manz sa; kas-kas bann biskwi kabinn-la dan mo tas dite ek apre lapes zot avek mo kouyer. Biskwi kabinn-la vinn inpe mou ek anmemtan li gard enn ti kram-kram telman li epe. Dite-la gagn mari bon gou avek so bann ti ron diber ladan.

Bon, aster bizin koumans trap balie koko pou balie lakour ek servi lans pou lav bann peron avek gran dilo. Bizin tir bann plans dibwa ki ti koulout lor pano vit lavarang. Bizin netway lakaz for-for.

Pas balie partou, pas siraz rouz Brito kat pat lor sali lavarang. Apre sa, bizin bros sali avek bros koko pou fer li glase. Zenou gagn dimal ek vinn rouz kan pas siraz anba lor kat pat. Mwa, mo prefer pas bros avek lipie pou glas sali. Gagn enn zoli kadans dan lerin avek sa bros dan lipie-la. Bizin bros dan lord ek fer kare lavarang-la net. Kan gete, kouma dir pe dans enn ti kadans. Lipie drwat avek bros krwaz kote gos par divan. Lebra osi balans dan mem direksion. Apre, lame ek lipie revinn an aryer ansam. Parey kouma mouvman balansie dan vie pendil ki ena kot mo gramer.

Apre enn siklonn, se enn eternel rekomansman. Enn travay efase refer…

Christina Chan-Meetoo, Senior Lecturer dan Media e Kominikasion ek Head Mediacom Studio dan Liniversite Moris. Li kolabor lor plizier proze lor Kreol Morisien ek Kreol Rodrige. Li finn diriz piblikasion liv “Kaya ant sime lamizer ek sime lalimier” an 2020. Antan ki serser, li pibliye ousi lor plizier tem kouma lapres dan Moris, drwa pou linformasion, legalite zom-fam, demokrasi ek nouvo media.